اتجوز عليا عشان مبخلفش

بعد جوازنا بسنة أكتشفت اني عندي مشكلة ومستحيل اخلف. جوزي ف البداية عادي ده نصيب وأنتي بنتي وانا إبنك والجو ده بس مامته ربنا يسامحها مسابتناش في حالنا وجات حسستني بالذنب وأني لو بحبه فعلا اقنعه أنه يتجوز عشانه وأنه هو نفسه ف ولد بس مش عاوز يعمل كده عشان ميجرحكيش انتي لو حسستيه ان الموضوع مش فارق معاكي هيتجوز وانا بالفعل حسيت ناحيته بالذنب وبقيت بحاول أقنعه أنه عادي مش هتفرق معايا واجبله بنفسي عرايس ربنا وحده يعلم الڼار اللي كنت فيها. ف الاخر بالفعل وافق واتجوز حاولت كتير والله استحمل الوضع ده لغاية ماحملت فعلا وشوفت فرحته وفرحة اهله حسيت احساس عمري ماهقدر اوصفه انا كان نفسي اوي فرحته دي ابقا انا السبب فيها كان نفسي ابنه يبقي مني انا. مقدرتش استحمل الوضع وقولت خلاص انتي مبقاش ليكي مكان انسحبي بهدوء بقا طلبت الطلاق رفض اضطريت أطلقه بالمحاكم.. انا مكنتش حابة الوضع بينا يوصل لكده أقسم بالله يمكن لو مكنتش بحبه كنت استمريت ع الوضع عادي بس مقدرتش أشوفهم مع بعض أقسم بالله ڠصب عني. وقتها كنت انا خامسة طب وبسبب الموضوع ده دراستي وقفت وحياتي تقريبا كلها وقفت بس قولت خلاص بقا انا مش هخسر كل حاجة واستمريت ف حياتي وحاولت اتناسي وكنت مخططة اني هخلص دراستي وهسافر ع دبي عند أخويا وشلت حوار الجواز من دماغي أصلا مين هيتجوز وحدة عقيمة!! انا حاليا ف الامتياز واتقدملي معيد ارمل وعنده 31 سنة حكيتله ع وضعي قال يا ستي انا عندي توئم مطلعين عيني واهو اعتبريها جوازة مصلحة وهتاخدي طفلين هدية بقوا ولادك خلاص.. ارتحتله وحسيت ان ربنا بيديني فرصة جديدة واتخطبنا بالفعل وكل حاجة ماشية تمام لغاية مالقيت طليقي باعتلي مسيج بيقول "طب انا مش متخيل أنك هتبقي ف حضڼ غيري دلوقتي!! " انا مش فاهمه هو مبسوط ف حياته مستخسر عليا ابقى مبسوطة!! انامن وقتها وحاسة كل حاجة وقفت تاني ورجعت زي اول فترة واللي اتخطيتها بالعافية واكتشفت اني للأسف لسة بحبه ومش عاوزة ادخل علاقة تانية وانا لسة عايشة ف شوائب العلاقة الأولي مش حابة اظلم شخص ملوش ذنب وائتمنلي ع ولاده وقولت لأهلي انا هفسخ وهسافر وهما رافضين تماما معتبرينها فرصة مستحيل تتعوض تاني وانا مبقتش عارفة اعمل إيه!