ابن الجيران

السلام عليكم 
انا انسة كبيرة في السن شويه عندي 38 سنة جميلة الى حد ما ومهتمة بنفسي وكل اللي يشوفني يفتكرني في العشرينات. اتخطبت اكتر من مره بس محصلش نصيب اما لاننا مش متناسبين او لظروف خارجه عن ارادتنا وانا عموما راضيه بقضاء ربنا. بشتغل وعملت ماستر وراضيه جدا في حياتي. 
مشكلتي اني من اسبوعين بس اتقدملي ابن جيراننا اللي عنده 29 سنه وهو بعمر اخويا الصغير. قبل ما يتقدم اتواصل معايا. فاكره انه كان بيبعتلي من اكونت عالفيسبوك من سنين لما كان عنده 20 سنه بس واكتشفت انه هو بالصدفه وعملتله بلوك كنت فاكراه بيتسلى مع انه شاب محترم ومن اسرة محترمة. عدت السنين وبين فتره والتانيه بيبعتلي عالسوشيال ميديا ومكنتش برد او اتظاهر اني مشفتش حاجه. هو اتجوز ومكملوش سنه بسبب مشاكل أسرية. من شهر بالضبط لقيته مستنيني تحت العماره وقالي ضروري عايز يكلمني في موضوع كدا ولاني رفضت اديه رقمي بسبب فكرتى السابقه عنه كلمني واحنا واقفين وقالي انه عايز يتقدملي وعايز أديه فرصه. انا افتكرته بيهرج والله. من اسبوع أمه كلمت امي في الموضوع بشكل رسمي وانا لحد دلوقتى مصدومه. اهلى مصډومين ومش عارفين ايه موقفهم وسمعته عنده كويسه بس فرق السن كبير. أمه تقول هو عايزها من سنين واحنا غصبناه عالاولانيه وبعدما فشل معاها المره دى قرروا يخطبوله اللي عايزها. 
ارجوكم نصيحه عشان المفروض هيجوا البيت اخر الاسبوع ومش عارفه اعمل ايه واهلى كمان