رواية وصية امي (كاملة جميع الفصول) بقلم كوكي سامح

كانت وصيه امى ليا انى بعد وفاتها اخد اختى الوحيده شيماء تقعد معايا واخد بالى منها لأن عندها ظروف خاصه، شيماء اختى بنت نوعا ما غير طبيعيه هى حاليًا عندها ١٧ سنه ويدوب لسه قالعه البامبرز من سنتين وليها ظروف خاصه من يوم ما اتولدت ماما لاحظت ان عندها نسبه حول بسيطه وملامح وشها غريبه كان كل اللى يشوفها يقول انها معاقه ذهنيًا، فالاول ماما قالت لا ومصدقتش وبعد ما تمت سنتين شيماء متكلمتش زى الأطفال اللى فى سنها ومن هنا ابتدت ماما المعاناه معاها بعد ما كشفت عليها والدكتور قالها ان عندها خلل فى النطق ودى اعاقه نتيجه عيب خلقى فى الدماغ وقتها انا فاكره كويس ماما تعبت ازاى، داخت بيها على دكاتره المخ والأعصاب ودخلتها مدارس خاصه وتخاطب رغم عدم المقدره لان بابا كان راجل ارزقى إنما ماما كانت تدخل جمعيات وتستلف علشان تحاول تساعدها ده غير انها كانت بتعمل حمام على نفسها لغايه سن ١٥ سنه وهى بتلبس بامبرز بجد تعب نفسى وجسدى لأمى ورغم كده كانت بتهتم بتعلمها ولما كنت اققولها هيفيد بايه ي ماما كانت ترد عليا بتنهيده وجع وتقولى: ي بنتى اختك بتفهم وتسمع كويس وانا بحاول اساعدها علشان تقدر تعيش وتخاف على نفسها، كان عندها امل ترجع طبيعيه وتعيش زى اى بنت فى سنها. 

كانت بتخاف عليها من كل حاجه حواليها 
_ولما ابتدت تكبر صدقت كلام ماما ليا لان فعلا شيماء جسمها اتغير وبقت فايره وملفته جسمًا ده غير ان ملامحها جميله لدرجه ان لما كانت تخرج معايا مكانش حد يعرف انها معاقه واتعرضت لت*حرش كذا مره وده خلانى أصدق كلام امى لما كانت تقولى بعلمها علشان تخاف على نفسها.
نسيت اعرفكم بنفسى
انا فرحه ٢٤ سنه متجوزه من المحامى وليد
اتعرفت عليه لما كانت ماما رافعه قضيه ت*حرش
ضد شاب جارنا كان بيضايق شيماء
وطبعا لان وليد شاطر جدا كسبها من اول جلسه
نسيت اقولكم انا عندى ولد واسمه عز الدين
وده بقى دلوعه العيله أصله اول حفيد
بابا م١ت ومن بعده ماما 😭
ومن هنا ابتديت انفذ وصيه امى واخدت شيماء
معايا على بيتى لأنها دخلت فى حاله اكتئاب
بعد وفاه ماما لانها كانت بالنسبه ليها كل شئ
وبصراحه لما قولت ل وليد اخدها تقعد عندنا رحب جدا وعمل ليها اوضه يمكن أجمل من اوضتنا بكتير، كان بيحبها اوى 
ويقولى انا معنديش اخوات بنات وربنا جعل 
شيماء اختى اللى امى مخلفتهاش
وليد عنده ٢ اخوات اكرامى وده خاطب 
اما اخوه التانى اسمه حسن وده عايش حياته 
بالطول والعرض من الاخر مقضيها 
احنا عايشين كلنا فى بيت عيله مكون 
من ٤ طوابق 
شقه حماتى وحمايا 

واحنا شقه وشقه اكرامى بيوضبها علشان يتجوز فيها والشقه الرابعه بتاعه حسن بس لسه 
على الطوب الأحمر
من يوم ما شيماء دخلت البيت وحماتى بتعاملها
احسن معامله، كانت بتقعد عندها طول الوقت

ولما كنت انزل اخدها علشان تنام 
الاقى حمايا بيلاعبها ويهزر معاها وده كان مريحنى نفسيًا لانها خرجت من حاله الاكتئاب
ده غير حسن واكرامى 
كانوا بيحبوها جدا زى اختهم بالظبط 
كانوا بيشتروا لها حلويات وهدوم وهدايا 
__ سنه وشيماء قاعده معايا لحد ما فى يوم 
دخل عليا اكرامى ومعاه فستان سورايه 
وطلب منى شيماء تلبسه ولما سألته اي السبب
رد وقالى: فى مفجأه ي مرات اخويا 
ويلا انتى كمان البسى أجمل ما عندك 
اليوم ده الباب خبط ولقيت بنوته وقالت إنها 
ميك ارتيست وليد جوزى بعتها 
وقتها حسيت ان فى حاجه انا معرفهاش 
اتصلت بيه وسألته رد وقالى خليها تعملك ميك اب انتى وشوشو وانجزى علشان فى مفجأه 
وفعلا البنت عملت الميك اب ليه وليها 
وشيماء كانت زى البدر فى تمامه واللى يشوفها
يقول انها بنت عاديه جدا
ياه على وجع القلب 💔 جميله بس ي خساره
وليد وصل من مكتبه ولما شافها بالفستان
والميك اب اتجنن واتبهر بجمالها
خدنى انا وهى وطلع بينا على السطوح
وكانت المفاجأه عيد ميلاد شيماء اللى نسيته
غصب عنى، لقيت اكرامى وحسن عاملين

تورتايه كبيره وعليها اسمها ده غير دى چى

وكانوا عازمين بنات الجيران وكانت ليله جميله 

شيماء كانت مبسوطه جدا 

طول الوقت بتضحك ضحكه براءة 

بس كنت ملاحظه حاجه غريبه 

انها طول الوقت جمب حسن 

كان مهتم بيها جدا لدرجه انا حسيت ان فى حاجه ما بينهم وطبعا ده مينفعش

شيماء مهما كانت فهى معاااااقه ومتنفعوش